ILOILO – Ginahingyo sang Philippine National Police sa publiko nga maghalong sa madata nga modus sang scam pinaagi sa text message kag sa social media.
Sa interview sang Bombo Radyo kay Police Colonel Joem Malong, tagpamaba sang Police Regional Office 6, iya ginpahayag nga santo sa record, apat na ka klase sang scam ukon pagpang-into ang natabo sa rehiyon.
Una diri suno kay Malong amo ang load scam, sa diin naga-text ang suspek sa biktima kag nagapakilala bilang isa ka elected official ukon prominente nga persona antes maghingyo sang load.
Suno kay Malong, gingamit na sang mga suspek sa modus ang pangalan nanday Police Regional Office Director Police Brig. Gen. Rene Pamuspusan, Iloilo City Police Office Director Police Colonel Martin Defensor Jr., kag Iloilo Provincial Police Office Directror Police Colonel Roland Vilela.
Ika duha amo ang electronic raffle sa diin nagapahibalo ang suspek nga may yara sang nadag-an nga promo ang biktima paagi sa text message ukon email.
Ika tatlo amo ang extortion ukon pagpangilkil sang New Peoples Army sa diin nagatawag ukon naga-text ang isa ka persona kag nagapakilala bilang miyembro sang rebelde nga grupo agud magpangayo sang kwarta kag nagapamahog kun balibaran.
Ika apat amo ang Budol-budol text sa diin nagpakuno-kuno ang suspek nga miyembro sang pamilya kag nagasiling nga may yara sang emerhensya agud mapadal-an sang load.
Ginpahayag ni Malong, importante nga alerto ang publiko kag dapat hibaluon sang maayo ang ginhalinan sang mensahe.
Indi gilayon magpati kag dapat lantawon sa internet kun bala legitimate ang kompanya nga ginapakilala sang persona nga nagatawag ukon nagatext.
Nagakadapat man nga magpakig-angot sa pinakamalapit nga police station ukon padal-an sang mensahe ang Police Regional Office sa tion nga may mabaton nga scam
