ILOILO CITY – Ginahulat pa sang Police Regional Office 6 (PRO-6) ang opisyal nga dokumento sa assignment ni Police Chief Insp. Jovie Espenido sa Iloilo.
Sa interview sang Bombo Radyo Iloilo kay PRO-6 spokesman Supt. Gilbert Gorero, ginpahayag sini nga wala pa sang may nabaton nga order gikan sa PNP national headquarters.
Ginpahayag ni Gorero nga welcome sa rehiyon si Espenido kag iga-assign sa nagakadapat nga posisyon kun basehan ang ranggo sang nasambit nga mga pulis.
Mahimo suno kay Gorero nga ibutang si Espenido nga pinuno sang drug enforcement unit ukon mangin station commander apang indi pa ini mahimo mag-uyat sang posisyon nga direktor sang Iloilo City Police Office ukon sa Iloilo Provincial Police Office bangud sa ranggo sini.
Wala man sang ideya ang PRO-6 kun san-o maabot si Espenido sa Iloilo apang nakadepende ini sa national headquarters sang PNP suno kay Gorero.