Gintuad sang Police Regional Office VI (PRO-6) nga wala pa nakabaton ang talatapan sang sulat nga nagatumod sang mga pangalan sang police personnel nga iga-dismiss sa pwesto.
Ini matapos mapamatud-an nga guilty sa seryoso nga administrative offenses base sa ginpatigayon nga imbestigasyon sang National Police Commission (NAPOLCOM).
Sa interview sang Bombo Radyo kay Police Lieutenant Colonle Arnel Solis, Spokesperson sang Police Regional Office VI, iya ginpahayag nga isa ka maayo nga tikang ang ginpatuman sang NAPOLCOM kon sa diin, mahatagan na sang hustisya ang mga complainants nga nagpasaka sang panumbungon batok sa pila ka pulis.
Suno kay Solis, isa ka palaagyan ang tikang agud maresolba ang kaso nga madugay na nga ginahulat sang complainant.
Dugang niya nga nagapakita lamang ini nga ang Philippine National Police (PNP) kag NAPOLCOM ang nagahulag kag nagasunod sa rekisitos kon sa diin, wala ginatolerar ang mga indi maayo nga hinimuan sang isa ka pulis.
Matandaan nga pila sa mga kaso ang gin-file sang tuig 2010 pa, samtang ang pinakaulihi nga reklamo nasumiter sang tuig 2022.
Lakip sa mga reklamo ang naga-angot sa grave misconduct, conduct unbecoming of a police officer, nga may mga kaso nga homicide, physical injury, may utang, kag iban pa.
Sa nangin desisyon sang NAPOLCOM En Banc, ginbasura ang kaso batuk sa 10 ka mga pulis bangud sa kakulang sang ebidensya, anum ang gin-dismiss sa serbisyo, apat ang gin-demote sang isa ka rank, tatlo ang gin-suspend sang 20 ka adlaw kag isa ang gin-suspend sang anum ka bulan.
