ILOILO CITY- Ginapadalman gid sang Police Regional Office 6 ang serye sang mga pagpamatay nga ginakaulamiran sang motor-riding suspects.
Sa interview sang Bombo Radyo kay Police Brigadier General Rolando Miranda, director sang Police Regional Office 6, iya ginpahayag nga kalabanan sa mga biktima ang naangot sa druga rason nga mga drug groups man ang ginatutukan sang imbestigasyon.
Suno kay Miranda, dako man ang posibilidad nga resulta sang turf war ang nagakatabo nga pinatyanay.
Hugot naman nga ginpanginwala sang regional director nga state- sponsored ang mga motor riding incidents.
Base naman sa data sang Police Regional Office 6, naglab-ot sa 90 ka mga kaso nga ginakaulamiran sang Motor Riding Suspects ang narekord sa rehiyon humalin Enero tubtob Nobyembre sa diin 32 ang ginakabig nga ‘solved’ nga nagakahulugan nga nadakpan ang mga suspek; 15 ang ‘cleared’ nga nagakahulugan nga natumod ang mga suspek apang wala madakpan; kag, 43 ang ‘under investigation.’
