ILOILO CITY – Pro-active approach ang ginapatigayon sang Iloilo City Government agud nga indi na makalab-ot sa syudad ang Coronavirus Disease 2019 (COVID-19).
Ini ang kasunod sang pagdeklarar ni Presidente Rodrigo Duterte nga ipaidalom sa Public Health Emergency ang Pilipinas bangud sa nagataas nga numero sang mga pasyente nga nagpositivo sa nasambit nga virus.
Sa interview sang Bombo Radyo kay Dr. Roland Jay. Fortuna, focal person for Coronavirus Disease 2019 (COVID-19) sang City Health Office, iya ginpahayag nga ang pro-active approach ang nagakahulugan nga ginahimu sang Iloilo City Government ang tanan nga preventive measures agud nga indi na maglapta ang COVID-19.
Suno kay Fortuna, iya nga ginsapol ang tanan nga stakeholders kasubong na lang sang Barangay Health Workers, tiglawas gikan sa mga hotel kag simbahan agud nga ipahanumdom kun ano ang mga dapat nga himuon agud nga indi malatnan sang virus.
Ginpahayag ni Fortuna nga sa masami, ginapanugyan ang proper hygiene ukon katinlo ilabi na sa mga pampubliko nga lugar agud nga indi maglapta ang kagaw.
Sa subong suno sa natungdan, naglab-ot sa 80 ang Persons Under Monitoring kun sa diin ang kalabanan sa ila amo ang mga naghalin sa luwas sang pungsod.
Lauman suno kay Fortuna nga sa mga masunod nga adlaw, mabuhinan na ang numero sag Persons Under Monitoring bangud nga magatapos na ang ila nga pagpaidalom sa 14-day quarantine period.
