Gindayaw ni Police Regional Office (PRO) VI Director, Police Brigadier General Flynn Dongbo ang mga police operatives nga nagpnguna sa madinalag-on nga anti-illegal drug operations sa Victorias City, Negros Occidental kag Bacolod City kun sa diin nakumpiska ang 705 ka grams sang suspected ‘shabu’ nga nagabalor P4,794,000.
Gin-aresto sang Victorias Component City Police Station (VCCPS) kag Philippine National Police – Drug Enforcement Group (PNP-DEG) sanday Jesther Soqueña, 46, kag residente sang Doña Juliana Subdivision, Barangay Taculing, Bacolod City kag Biboy Dacumos, 38, residente sang Lison, Barangay 1, Bacolod City sa buy-bust operation sa Barangay 21, Victorias City.
Nakumpiska sa duha ka durugista ang duha ka dalagko nga sachets sang suspected shabu nga nagabug-at sang 500 grams kag may standard drug price nga P3,400,000.
Sa isa pa ka buy-bust operation nga ginpangunahan sang Bacolod City Police Station 8 kag PNP-DEG sa Purok Kabulakan 1, Barangay Singcang, Bacolod City, dakop man si Mark Daniel Angas, 39, kag residente sang Purok Ramon Magsaysay, Barangay 14, Bacolod City.
Narekober kay Angas ang pila ka sachets sang suspected shabu nga nagabug-at sang 205 grams kag may standard price of P1,394,000.
Sa interview sang Bombo Radyo kay Police Lt. Colonel Arnel Solis, spokesperson sang PRO VI, iya ginpahayag nga ginapanginbulahan gid ni Police Brigadier General Dongbo ang joint operating personnel sa pag-aresto sa tatlo ka high value individuals.
Suno kay Solis, nagakadapat lang nga matapna ang iligal nga droga sa pungsod pinaagi man sa pagbululigay sang mga otoridad kag sang pumuluyo.
Sa subong, detained na ang mga nadakpan nga durugista sa Victorias Component City Police Station kag Bacolod City Police Station 8.
