𝗜𝗟𝗢𝗜𝗟𝗢 𝗖𝗜𝗧𝗬 – Ginpasalig sang pamunuan sang kapulisan sa Western Visayas ang bug-os nga suporta sa Dugong Bombo 2024, A Little Pain, A Life to Gain.
Sa interview sang Bombo Radyo kay Police Brigadier General Jack Wanky, director sang Police Regional Office VI, iya ginpahayag nga naeskperyensyahan mismo sang ila pamilya ang importansya sang dugo.
Suno kay Wanky, may yara sang balatian nga cancer ang iya utod nga babaye sa diin halos kada duha ka semana, ginatughungan ini sang dugo.
Ginpahayag sini nga bangud sa dugo nga nadonar sa iban nga tawo, nabuligan nga mangin cancer survivor ang iya utod.
Umpisa sadto, ginpasalig na ni Wanky nga magasuporta ini sa tion nga may yara sang mga patigayunon nga bloodletting activity kaangay na lang sang Dugong Bombo.
