Ginmanduan ni Police Regional Office VI director Brigadier General Josefino Ligan ang mga pulis sa Western Visayas nga magbantay gid ilabi na sa mga establisyemento komersyal kadungan sang pagsugod sang ber months.
Ini agud malikawan ang economic crimes kaangay sang pagpangawat kag pagpang-hold-up.
Kasunod sang hold-up incident sa parking area sang isa ka mall sa Mandurriao, nauna naman ini naghatag sang direktiba nga magpatigayon sang security conference kaupod sa mall guards kag security managers para nga malikawan ang kaangay sini nga mga krimen sa holiday season.
Kabahin man ini suno sa iya sang preparasyon na sang kapulisan para sa Paskuwa.
“Huwag nating ilagay sa ating isip na pagka-ber month, dadami din yan [ang economic crimes.] Anong gagawin natin? Ibubuhos natin ang tao natin sa mga possible places na magkakaroon ng krimen especially doon sa mga business establishments,” suno sa police official.
Nauna naman nga ginpahayag pareho sang Iloilo City Police Office (ICPO) kag Iloilo Police Provincial Office (IPPO) nga ginpasangkad na ang ila nga visibility sa mga mall, transport terminals, tourist spots, kag iban pa nga mga matawo nga mga lugar.
