ILOILO CITY – Ginapa-imbestigaran na sang Police Regional Office VI kun bala, konektado ang serye sang krimen nga natabo sa syudad kag probinsya sang Iloilo subong nga tuig.
Sang Pebrero 27, patay sanday Michael Quizon, 31, residente sang Barangay Ticud, Lapaz, Iloilo City, kag Kenneth Limbaco, 25, residente sang Barangay Desamparados, Jaro, Iloilo City matapos gintiro sang wala pa nakilala nga suspect sa Barangay Jibao-an, Pavia, Iloilo.
Marso 23 sang nasapwan nga wala na sang kabuhi si Allen Sanchez, 58, residente sang Zone 5, Barangay Sto. Niño Norte, Arevalo, Iloilo City sa isa ka talamnan sa Barangay Linobayan, Tigbauan, Iloilo.
Marso 26, maswerte nga wala napatay ang isa ka ex-convict nga si Glen Paloma, residente sang Barangay Zamora-Melleza, Iloilo City Proper nga ginhal-id sa Barangay Calaboa, Leganes.
Lakip sanday Police Executive Master Sergeant Jessie Jim Rubio kag Police Staff Sergeant Enrico Carlito Gonzales sa anum ka mga suspects nga ginpasakaan sang kaso sang Iloilo Police Provincial Office.
Marso 31 sang gintiro naman sanday Jomar Mendoza, ginbanta 30-anyos, residente sang Barangay San Nicolas, La Paz kag Edmund Mendoza, 32-anyos residente sang Barangay Baldoza, La Paz.
Sa interview sang Bombo Radyo kay Police Brigadier General Leo Francisco, director sang Police Regional Office VI, iya ginpahayag kinahanglan nga matul-id kun bala, konektado ang mga krimen.
Samtang sa kaso sang duha ka pulis nga naangut sa shooting incident, ginpahayag ni Francisco nga gin-relieve na ang mga ini agud nga indi maka-apekto sa ongoing administrative investigation sang Regional Investigation and Detective Management Division kag sa subong, yara sa Regional Personnel Holding Accounting Unit.
Nagpasalig ang director nga magahatag ini sang suporta sa duha ka mga pulis sa tion nga indi matuod ang akusasyon batuk sa ila.
Gindayaw man sang director ang Iloilo Police Provincial sa madasig nga pagsolbar sang krimen.
