Gindayaw sang Police Regional Office (PRO) VI ang madinalag-on nga pagdakop sang katapo sang pulis kag Regional Police Drug Enforcement Unit (RPDEU) VI sa mga dalagko nga durugista sa syudad sang Iloilo.
Matandaan nga sang nagligad nga Pebrero 4, tatlo ka durugista ang na-aresto sang Iloilo City Police Station 2, 3, kag 4 kaupod ang RPDEU VI sa sunod-sunod nga buy bust operations sa syudad.
Nadakpan sa Barangay Tap-oc, Molo, Iloilo City sanday Gerald Pumares, 34, residente sang Balabago, Jaro, Iloilo City kag Irvin Del Rosario, residente sang Barangay Bonifacio, Arevalo, Iloilo City.
Anum ka sachets sang suspected shabu ang na-recover kay Pumares, samtang isa naman ang nakuha kay Del Rosario nga may standard drug price nga P204,000.
Samtang, arestado man si Bonjie Divinagracia sang Barangay Calubihan, Jaro, Iloilo City kag na-recover sa iya ang anum ka sachets sang suspected shabu nga may Standard Drug Price nga P238,000 kag P7, 000 nga buy bust money.
Sa interview sang Bombo Radyo kay Police Lt. Col. Arnel Solis, spokesperson sang PRO VI, iya ginpahayag nga bangud sa bulig sang mga pumuluyo nga nagapalab-ot sang impormasyon sa mga otoridad angot sa drug personalities, mas napadasig ang trabaho sang mga pulis.
Suno kay Solis, nagapakita man ini sang kapisan sang mga pulis sa ila trabaho.
