Gin-abi-abi kag ginpasalamatan sang Police Regional Office (PRO) VI ang mandu ni Philippine National Police (PNP) chief Gen. Rommel Francisco Marbil nga himuon nga walo ka oras ang duty sang mga pulis sa baylo nga 12 ka oras.
Sa interview sang Bombo Radyo kay Police Colonel Arnel Solis, spokesperson sang PRO VI, iya ginpahayag nga kabahin ini sa pag-ulikid sa ikaayo sang mga personnel kag magahatag man sang ligwa sa ila nga maka-upod sa ila pamilya.
Sa regional nga lebel suno kay Solis, ginapasigurado man nga na-assign kag natunga-tunga sang maayo ang mga pulis agud nga may 24/7 nga visibility kag may nagatinir man sa police station.
Ini agud indi man makalusot ang mga kriminal suno sa iya kag mahatag ang serbisyo nga kinahanglanon halin sa PNP.
Matandaan nga ini nga development ang gin-anunsyo ni Marbil kadungan sang Pamilya ng Pulis Family Day sa Camp Crame.
Ini suno sa iya ang rason kun ngaa ginmandu niya ang deployment sang 85 porsiyento sang 232,000 ka mga pulis sa field sa baylo nga magtutok sa administrative work. Ginasiguro suno sa iya nga mas madamo nga pulis ang yara gid sa ground apang tag-walo ka oras lang ang duty agud nga makapauli man sila sa ila tagsa ka pamilya.
