ILOILO CITY – Maga-request sang pondo ang Police Regional Office VI sa Camp Crame para sa pagpatukod sang kaugalingon nga building para sa Regional Explosive Ordnance and Canine Unit.
Ini ang kasunod sang natabo nga pagsigabong sa opisina sang Regional Explosive Ordnance and Canine Unit VI sa sulod sang compound sang Iloilo City Police Office.
Sa interview sang Bombo Radyo kay Police Regional Office VI director Police Brigadier General Leo Francisco, iya ginpahayag nga ang opisina nga ipatindog ang malayo sa opisina sang iban nga unit sang kapulisan.
Suno sa director, ang opisina sang Explosive Ordnance and Canine Unit ang wala sang may madamo nga tawo.
Sa bahin sang Regional Explosive Ordnance and Canine Unit VI, ang ila opisina ang tuman ka lapit indi lang sa iban nga opisina sa Iloilo City Police Office kundi mangin sa kalsada nga makabig nga major thoroughfare.
Maayo lang suno kay Francisco bangud wala sang madamo nga tawo sang natabo ang pagsigabong bangud kun natabo, tuman gid ka dako sang disgrasya.
Delikado man sa tawo kun matandog ang substance nga yara sa mga explosives.
Padayon naman ang imbestigasyon agud nga matumod ang kapaltahan sa safety measures sa nasambit nga opisina.
Nagmandu man ang director nga magpatigayon sang inventory sa tanan nga mga powder kag chemical nga naka-store sa opisina kag pangitaan sang stock room nga safe para sa tanan.
Nahibaluan nga napilasan sa amo nga pagsigabong sanday Patrolwoman Shyrine Manuel, Fernando Sabidalas nga lineman sang isa ka telecommunication company kag John Mark Garcia.
Kahapon sang hapon, nakagwa na sa ospital si Patrolwoman Manuel.
