ILOILO CITY – Magapahamtang sang bike lane ang Iloilo City Government sa sulod sang Police Regional Office VI.
Ini ang mangin pinakauna nga bike-friendly camp sa bilog nga pungsod.
Sa interview sang Bombo Radyo kay Mr. Jeck Conlu, pinuno sang Iloilo City Public Safety and Transportation Management, iya ginpahayag nga madamo sang mga pulis nga naga-bike padulong sa kampo kag may yara na sang ginpangbutang nga bike racks.
Suno kay Conlu, madamo man sang nagapatigayon sang transaksyon sa nasambit nga kampo kag limitado lamang ang parking area.
Pahayag niya, sa tion nga matapos na ang pag-rehabilitate sang road network sa sulod sang kampo, magasugod na sa paghimo sang bike lane ang Department of Public Works and Highways sa bulig sang Iloilo City Government.
Dugang pa niya, ang bike lane nagikan sa esplanade ang i-connect sa gate mismo sang Police Regional Office VI padulong sa tanan nga road network sa sulod sang kampo.
Magluwas sa kampo, nagaplano man ang Iloilo City Government nga magpahamtang man sang bike lane sa iban nga national government offices sa syudad.
