ILOILO CITY – Ginahulat na lamang sang Police Regional Office VI ang mando sang Philippine National Police National Headquarters may kaangtanan sa magapungko nga director sang Iloilo Police Provincial Office.
Sa interview sang Bombo Radyo kay Police Brigadier General Leo Francisco, director sang Police Regional Office VI, iya ginpahayag nga ginpasa na niya sa national headquarters ang sabat ni Iloilo Governor Arthur Defensor, Jr.
Base sa sabat sang gobernador, ginpili niya si Police Colonel Ronaldo Palomo nga amo ang magatal-os kay Police Colonel Noel Aliño nga amo ang acting provincial director.
Si Palomo ang graduate sang Philippine National Police Academy Class 1998 nga nagikan sa Passi City kag subong, na-assign sa National Personnel Holding and Accounting Unit sang Philippine National Police headquarters sa Camp Crame.
Suno kay Francisco, halin sa Camp Crame ang mga pangalan nga gin-endorso sa gobernador gani, ginpasa man niya sa national headquarters ang sabat sang opisyal.
Dugang pa niya, wala sang klaro nga polisa sa kun sin-o ang masunod– ang ginpili sang local chief executive ukon ang ginpili sang pamunuan sang Philippine National Police.
Nahibaluan nga lakip man sa ginpili-an ni Defensor amo sanday Aliño kag si Police Colonel Gervacio Balmaceda, Jr.
