ILOILO CITY – Ginahulat nalang sang Police Regional Office 6 ang kopya sang warrant of arrest nga iserbe kay Antique Governor Rhodora Cadiao.
Sa interview sang Bombo Radyo Iloilo kay Police Major Mary Grace Borio, spokesperson sang Police Regional Office 6, iya ginpahayag nga wala sang pili mapa-opisyal man ukon sibilyan sa pag-serbe sang warrant of arrest base sa nakasaad sa layi.
Ang warrant of arrest nga atubangon ni Cadiao amo ang paglapas sa Anti-Graft and Corrupt Practices Act nga pirmado ni Sandiganbayan Seventh Division Chairperson Associate Justice Ma. Theresa Dolores Estoesta kag ini ang may pyansa nga P90,000.
Nahibaluan nga nag-umpisa ang kaso sang tuig 2016 matapos gin-reassign ni Cadiao si General Services Office head Antonio Dela Vega sa ila satellite office sa Culasi, nga may kalayuon nga 100 kilometers nagikan sa provincial capitol sa banwa sang San Jose.
Naghingyo sang bulig si Dela Vega may kaangtanan sa iya ”transfer order” sa Civil Service Commission, sa pagpati sini nga may katumbas ini sang ”constructive dismissal”.
Sang Marso 2017, ginmando sang Civil Service Commission ang pag-reinstate kay Dela Vega sa Provincial General Services Office kag gin-request ang provincial government nga baydan ini sang representation kag travel allowance (RATA) kag iban pa nga mga benefits umpisa sang ginsaylo ini sa Culasi, sang Hulyo 2016 tubtob Pebrero 2018.
Nagdesisyon naman si Dela Vega nga magpasaka sang reklamo batok kay Cadiao sa Office of the Ombudsman Visayas sang tuig 2018 matapos nga wala ini may nabaton nga benepisyo suno sa mando sang Civil Service Commission.
Wala naman ginpirmahan sang gobernador ang iya daily time record nga nagresulta sa kapaslawan sang Provincial Accountant kag Provincial Treasurer nga magproseso kag magpagwa sang iya benepisyo.
Nakit-an naman sang Ombudsman ang probable cause agud ma-indict si Cadiao sa one count sang paglapas sa Section 3(e) ng Republic Act 3019 ukon Anti-Graft and Corrupt Practices Act sa resolution nga may petsa sang Setyembre 2, 2019.
Ini ang pirmado ni Deputy Ombudsman for the Visayas Paul Elmer Clemente kag aprubado ni Ombudsman Samuel Martires sang Oktubre 22, 2021.
Sang Hunyo 7, 2023, ginpagwa ang arrest warrant batok kay Cadiao.
Ang kasuguan nga arestuhon si Cadiao ang naka-address sa Philippine National Police chief; director ng National Bureau of Investigation; chief of police ng San Jose, Antique; police provincial director sang Antique; kag director sang NBI sa Region 6.
Ginpangayuan naman sang Bombo Radyo Iloilo sang sabat si Cadiao, apang naghingyo ini nga indi nalang ini anay maghatag sang komento.
