ILOILO – Nagpaandam ang Police Regional Office (PRO) VI sa mga alkalde sa Western Visayas may kaangtanan sa mga scammers nga nagagamit sang pangalan ni Iloilo Police Provincial Office (IPPO) Director PCol. Paul Kenneth Lucas.
Sa interview sang Bombo Radyo kay Police Master Sergeant Francisco Lindero Jr., tagpamaba sang IPPO, iya ginpahayag nga may tatlo na ka local chief executives sa probinsya nga nabiktima sang amo nga scam kun sa diin nakahatag ang mga ini sang daku nga balor sang load sa mga suspek.
Suno kay Lindero, sa idalom sang amo nga modus, nagapakig-angot ang scammer, nagapakilala bilang si PCol. Lucas, kag nagahingyo sa alkalde nga magpakigkita sa syudad sang Iloilo para sa isa ka proyekto sa banwa sang Sta. Barbara.
Ginpahayag ni Lindero nga samtang pakadto na sa syudad, nagapangayo sang load ang scammer kag masami nagabalor sang P4,500 tubtob P5,000 sa rason nga basi mabutang sa emerhensya ang linya sang komunikasyon.
Sa subong, padayon pa nga ginatumod sang kapulisan kun sin-o ang nagapanguna sa nasambit nga modus.
Nagpahanumdom man si Lindero nga wala ginapaagi sang IPPO director sa cellphone ang transaction kun may mga ginadevelop nga proyekto bangud ginadiretso ini kay Iloilo Governor Arthur Defensor Jr.
