Ginpahanumdom sang Police Regional Office (PRO) VI sa publiko ilabi na sa licensed gun owners nga maga-umpisa na sa Enero 12, 2025 ang gun ban kaangot sa midterm elections.
Kaangot diri, lauman ang mas istrikto nga pagpatuman sang checkpoints sa mga lugar sa Western Visayas para masigurado nga malinong sa piniliay kag wala sang mga kalakasan nga matabo gamit ang mga armas.
Suno kay Brig. Gen. Jack Wanky, director sang PRO-Western Visayas, antes pa man ang Enero 12, may na-establisar na nga checkpoints ang nagkalain-lain nga police stations bilang kabahin sang preparasyon.
Sa sini nga checkpoint, wala nagatinir sa isa lang ka lugar ang mga pulis kundi nagasaylo-saylo sang area para indi mapaktan sang mga tawo ang ila pattern.
Nahibaluan nga sa idalom sang gun ban, istrikto nga ginadumilian ang pagdala ukon pagbyahe sang armas kag iban pa nga makamamatay nga bagay kaangay sang patalom magluwas lang kun otorisado ini sang Comission on Elections (Comelec).
Makabig nga election offense ang paglapas sa gun ban kag may daku nga penalidad kaangay sang pagka-preso, permanent disqualification sa pagpungko sa public office, kag pagkadula sang kinamatarong sa pagboto.#
