Nagpaandam ang kapulisan sa posible pangatubangon nga mga kunsekwensya sang mga indibidwal nga magalapas sa liquor ban nga ipatuman epektibo Domingo, Mayo 11.
Suno kay Police Lt. Colonel Arnel Solis, spokesperson sang Police Regional Office VI, ang bayolasyon sa sini nga pagsulundan ang mahimo magresulta sa pagka-preso sang isa tubtub anum ka tuig.
Mahimo man madagdag ang penalidad nga permanente nga disqualification sa public office kag pagkadula sang kinamatarong sa pagboto.
Tubtub sa Lunes, Mayo 12, ang implementasyon sang ban kag na-cover sini ang tanan bisan ano pa ang political affiliation.
Buot silingon sini, isa ka adlaw antes ang eleksyon, kag sa mismo adlaw sang piniliay, hugot nga ginadumilian ang pagbakal, pagbaligya, pagdala, kag pag-inom sang makahulubog nga ilimnon.
Ginadumilian ang hotel, resort, restaurant owners kag managers nga mag-intra sa mga aktibidad nga naga-involve sang makahulubog nga ilimnon.
Ang exempted lamang amo ang mga establisyemento nga na-certify sang Department of Tourism (DOT) bilang tourist-oriented kag regular nga naga-cater sa foreign tourists.
Mahatag ang exemption kun nakakuha ang establisyemento sang written approval halin sa Comelec officials, kag pananglitan naaprubahan sang poll body, ang foreign tourists lamang ang pwede nga maka-inom sang alcohol sa exempted establishments sa tion nga ginapatuman ang liquor ban.
