Ginatugyan na sang Police Regional Office (PRO) VI sa korte ang dalagan sang kaso sa likod sang pagpatay sa negosyante nga si Claire Diergos.
Sa interview sang Bombo Radyo kay PRO VI Spokesperson Pol. Lt. Col. Arnel Solis, iya ginpahayag nga natuman na sang Iloilo Police Provincial Office (IPPO) ang ila mandato bilang pulis bangud ma-id-id man sila nga nag-imbestigar kag na-file man ang murder complaint batok sa mga ginatudlo suspek sa krimen.
Matandaan nga may gintukod pa nga Special Investigation Team (SIT) nga amo ang nagtutok sa Claire Diergos Murder Case.
Oktubre 2021 sang nasapwan nga patay si Diergos.
Duha subong ka suspek ang nagsungka — sanday Raffy Sorioso kag Rudelyn Sumbong — apang arestado gihapon ang ila status suno kay Solis.
Si Sorioso ang nagsurrender kahapon sa katapo sang Criminal Investigation and Detection Group ukon CIDG-Iloilo sa Barangay San Vicente, sa banwa sang Leganes.
Sanday Sorioso kag Sumbong ang nalakip sa tatlo nga gin-indict sa ginpatigayon nga preliminary investigation sang Iloilo Provincial Prosecutor’s Office matapos nakitaan sang probable cause nga pasakaan sang kaso nga murder.
Matandaan man nga may panumbungon man nga ginpasaka batok kanday anay San Dionisio Iloilo, Mayor Peter Paul Lopez , iya asawa nga si Sally Lopez kag tatlo nila ka kabataan, apang na-dismiss sa lebel sang piskalya bangud wala sang bastante nga ebidensya.
Si Gardo Ibrahim nga lakip sa gin-indict amo subong ang nagapabilin nga at-large.
