Ginakabig nga ‘alarming’ sang Police Regional Office 6 (PRO6) ang nakumpiskar nga P74.87 million nga balor sang ilegal nga droga sa bug-os nga Western Visayas sa bulan lang sang Pebrero subong nga 2026.
Base sa datos sang PRO6, ang Iloilo Police Provincial Office (IPPO) amo ang nakarecord sang pinakadako nga nakumpiskar nga droga, matapos nga naglab-ot sa P46.1 million nga balor sang illegal drugs ang narecover sang ila nga mga kapulisan.
Suno kay PBGEN. Josefino Ligan, Regional Director sang PRO6, bangud sa mataas nga numero sang nakumpiskar nga droga kun sa diin may ara man sang mga involved nga mga barangay officials, ginkabig gid nila ini nga seryoso nga sitwasyon.
Pahayag niya, base sa mga ginpatigayon nga imbestigasyon, halin mismo sa National Capital Region ang mga nagaabot nga droga sa Western Visayas.
Dugang pa ni Ligan agud nga masiguro nga wala sang magalab-ot pa nga droga sa rehiyon, magapadayun ang ila hugot nga pagbantay sa bulig man sang ila partner agencies sa mga area sang Western Visayas
agud nga matumod ang mga posible ginaagyan ukon mga pamaagi nga makasulod ang illegal nga droga.
