Ginpabaskog sang Police Regional Office 6 (PRO-6) ang mga tikang sa seguridad sa pag-antisipar sang 2025 midterm elections period.
Opisyal nga magasugod sa Enero 12, 2025, lakip ang gin-intensify nga mga checkpoint kag estrikto nga pagpatuman sang gun ban.
Sa interview sang Bombo Radyo kay Police Lieutenant Colonel Arnel Solis, spokesperson sang Police Regional Office 6, iya ginpahayag nga nakatutok sila subong sa pagpabaskog sang checkpoints agud masiguro ang malinong, matawhay kag tampad nga eleksyon.
Ginpaathag niya nga ang mga checkpoints gintukod na sang nagkalainlain nga mga estasyon sang pulis antes ang adlaw mismo sang eleksyon.
Ini nga mga checkpoint amo ang mobile agud malikawan ang predictability kag mapauswag ang effectiveness sini.
Nagpahanumdom man ni Solis sa mga lisensyado nga tag-iya sang pusil nga ginadumilian ang pagdala sini sugod Enero 12, 2025.
Sa pihak nga bahin, gin-anunsyo man sang Iloilo City Police Office (ICPO) ang dugang nga security operations, partikular kadungan sang Dinagyang Festival.
