ILOILO – Nagapakig-angot sang Police Regional Office (PRO) Western Visayas sa Office of Civil Defense (OCD) agud makahatag sang nagakaigu nga serbisyo sa mga pumuluyo nga apektado sang Bagyo Tisoy.
Ini ang magapadayon pa sa tion nga makaguwa na ang bagyo sa Philippine Area of Responsibility (PAR) bangud handa gihapon ang kapulisan sa pagbulig sa search and rescue operation.
Sa interview sang Bombo Radyo kay Pol Lt Col Joem Malong, tagpamaba sang PRO 6, iya ginpahayag nga tagsa ka police station ang may ara na sang mga deployed personnels agud makabulig sa posible patigayunon nga search and rescue operation.
Ini ang base man sa instruksiyon ni PRO Director Pol BGen Rene Pamuspusan.
Sa bilog nga rehiyon, 223 ka mga Search and Rescue ukon SAR personnel ang on-standby, 1, 324 on standby sa mga police stations, kag 364 naman ang yara sa headquarters.
Dugang pa ni Malong, may yara man sang regular nga situation report ang kapulisan natuhoy sa sitwasyon sa ila tagsa ka mga area of responsibilities.
Kaangot diri, yari ang pinakaulihi nga report sa PRO 6:
563 persons ang stranded
30 — salakyan stranded
30 — sakayan pandagat stranded
7 flooded areas- (1 sa Aklan kag 6 sa Capiz)
740 evacuation centers ang na record nga may yara sang 4, 738 evacuees:
Numero sang mga evacuees:
Aklan- 674
Antique- 675
Capiz- 3429
Samtang, isa ka missing person ang narekord sa diin padayon gihapon nga ginapangita sa Maayon, Capiz bangud ginapahayag nadala ini sang daludo sang tubig sang nagtabok ini sa overflow.
