Mandurriao, Iloilo City – Magapatawag sang pagsinapol ang Police Regional Office 6 sa barangay officials sang Barangay Bakhaw, Mandurriaw, Iloilo City agud matapna ang lapnagon nga paggamit sang iligal nga droga.
Sa interview sang Bombo Radyo kay Police Regional Office 6 regional director Police Brigadier Gen. Leo Francisco, iya ginpahayag nga sapulon sini ang mga opisyal sang barangay agud maplastar kun ano ang ila papel kag kontribusyon sa pagpapas sa illegal drugs.
Matandaan nga sang nagligad nga semana, 32 ka mga ginapahayag durugista ang nadakpan sang Regional Police Drug Enforcement Unit VI sa amo nga barangay.
Suno kay Francisco, sentro sa gihapon ang nasambit nga barangay sa paggamit sang droga bangud nakahamtang ini sa lugar nga indi madali masudlan sang mga otoridad.
Luyag sang natungdan nga hibaluon ang problema kag nangin tikang sang barangay officials agud mauntat ang paggamit sang droga sa amo nga barangay.
Tuman ka importante suno kay Francisco ang impormasyon nga matipon nagikan sa Barangay Bakhaw agud mapasakaan sang nagakaigo nga kaso ang mga nadakpan nga mga durugista.
Nahibaluan nga yara sa Mandurriao Police Station ang mga arestado, kag suno sa otoridad, halos 85-90 percent sa ila ang nagpositibo sang ginpaidalom sa drug test.
