Nagsugod na sa pag-imbestigar ang Police Regional Office 6 (PRO 6) nahanungod sa ginaalegar pagpangilkil sang ginapatihan pulis sa pamilya sang naaresto sa buy-bust operation nga ginpatigayon sang Molo Police Station.
Kasunod ini sang naglapta nga audio recording kun sa diin mabatian ang gina-alegar pag-isturyahanay sang personnel sang Molo PNP kag pamilya sang nadakpan sa nasambit nga operasyon.
Sa audio, ginapahayag nga nabatian ang pagpangayo sang kwarta ukon ransom sang personnel sa pamilya sang subject sa baylo sang pagpagwa sang ila himata kun sa diin dapat man nga wala sang may makahibalo sang ila transakyon.
Suno kay PRO 6 Director PBGEN Randulf Tuaño, gilayon sila nga nagpatigayon sang imbestigasyon agud mahibaluan kun matuod ang mga nagalapta nga istorya kag kun sin-o ang mga nalakip nga mga kapulisan.
Sa tion nga mapamatud-an nga pulis ukon nagpakuno-kuno lang nga mga pulis ang yara sa likod sang kontrobersiya nga luyag mangilkil sang kwarta, pasakaan ini sang nagakaigo nga kaso kriminal.
Nagpahanumdom man ang PRO 6 sa publiko nga indi maghatag sang kuwarta sa bisan sin-o nga nagapasalig nga pagwaun ang isa ka nadakpan kag hibaluon gid kun bailable ang kaso sa mismo nga opisina.
Ginpasiguro man sang PRO 6 nga patas kag evidence-based investigation ang ginapatigayon sa nasambit nga mga alegasyon.
 nahanungod sa ginaalegar pagpangilkil sang ginapatihan pulis sa pamilya sang naaresto sa buy-bust operation nga ginpatigayon sang Molo Police Station.){kind=link}