ILOILO CITY–Dako ang pagsalig sang Director sang Police Regional Office (PRO) 6 sa iya mga sakop sa pihak sang asud-asud nga pagkamatay sang mga subject sang anti-illegal drugs operation.
Sa interview sang Bombo Radyo kay Police Chief Superintendent John Bulalacao, mas ginapatihan niya ang report sang iya mga tinawo nga nagabato ang subject sang buybust operation.
Sunu kay Bulalacao, kinahanglan nga pangapinan man sang mga pulis ang ila kaugalingon.
Wala naman naalarma ang Regional Director sa numero sang nagkalamatay sa drug operation nga naglab-ot na sa 7.
Ginpanindugan man ni Bulalacao nga ginatuman lamang nila ang mando sang PNP national headquarters sa pagpatuman sang relentless campaign.
Samtang, kinahanglan nga utdon na sang mga durugista ang ila negosyo nga iligal nga doga agud indi matabo sa ila ang natabo sa 7 ka mga nagkalamatay sa anti drug operation sang kapulisan.
Suno kay Bulalacao, makahatag sang kakugmat sa mga may kaangtanan sa iligal nga droga ang mas ginpabaskog nga kampanya sang PNP.
Wala sang may ginapili ang PNP suno kay Bulalacao kag wala man sang kaluoy sa mga durugista nga nagabato sa drug operation.
Gin-atahg man sang PRO 6 Director  nga indi nila tuyo nga pamatyon ang ila subject apang indi man sila maghatag sang kumpyansa ilabi na sa mga magabato sa ila.