Nagpaguwa sang preemptive measures ang Police Regional Office 6 (PRO6) sa tagsa ka mga establisyemento agud malikawan ang paglapnag sang kinawatay sa Western Visayas.
Sa interview sang Bombo Radyo kay Police Brigadier General Jack Wanky, regional director sang Police Regional Office 6 (PRO6), iya ginpahayag nga nagpaguwa na sila sang direktiba sa mga head kag director sang tagsa ka talatapan sa rehiyon agud nga mapatuman ang tikang.
Suno kay Wanky, lakip sa mando amo ang magakoordinar ang ground commanders sa mga nagapana-iya sang mga establesyemento, sa ila security managers and offices agud nga mapasangkad ang ila security measures.
Ginpahayag man sini nga nagrekomenda man sila sang security surveillance sa tagsa ka area sang establishments agud matumod ang lugar nga may security vulnerabilities.
Ginalauman naman sang PRO6 nga magakoordinar sa ila ang security managers sang mga establsyemento agud nga malig-on nga mapatuman ang ginaduso nga preemptive measures.
