𝗪𝗘𝗦𝗧𝗘𝗥𝗡 𝗩𝗜𝗦𝗔𝗬𝗔𝗦 — Naka-deploy na ang Police Regional Office 6 (PRO6) sang ila mga personnel sa pila ka mga lugar sa Western Visayas para sa ika-tatlo nga State of the Nation Address (SONA) ni President Ferdinand “Bongbong” Marcos, Jr. sa Batasang Pambansa sa Quezon City.
Sa interview sang Bombo Radyo kay Police Lieutenant Colonel Arnel Solis, spokesperson sang Police Regional Office 6, iya ginpahayag nga magapatuman sila sang maximum tolerance agud nga mapabilin ang hugot nga pagbantay sa aspeto sang peace and order.
Suno kay Solis, nakahanda ang mga station commanders sa nagkalain-lain nga parte sang Western Visayas agud nga i-intensify ang pwersa sang mga police personnel.
Ginpahayag man sini nga naka-focus kag naga-monitor sa tagsa ka units sang kapulisan agud nga mangin preparado sa dugang nga personnel kon kinahanglanon.
Hugot man nga ginapatuman strikto ang pagpadumili sa mga iligal nga aktibidad samtang nagapadayon ang State of the Nation Address ni Marcos.
Strikto naman ang ahensya sa mga naga-rally, bangud ‘no permit, no rally’ policy ang ila nangin regulasyon agud nga indi na makahatag pa sang dugang nga huol sa mga motorista kag trapiko.
