ILOILO – Wala sang may ginapasin-o ang Philippine National Police – Integrity Monitoring and Enforcement Group (PNP- IMEG) sa pagpatuman sang kampanya sang internal cleansing nga amo ang isa sa mga prayoridad ni PNP Chief General Archie Francisco Gamboa.
Ini matapos nga ginpatigayon ang entrapment operation sa syudad sang Bacolod sa diin arestado si PMAJ Melvin Madrona, hepe sang Bacolod City Criminal Investigation and Detection Group (CIDG).
Dakup man sa amo nga operasyon ang civilian nga upod ni Madrona nga si Jay-R Dela Cruz.
Suno kay Police Regional Office (PRO) 6 Director PBGen Rene Pamuspusan, ang nasambit nga entrapment operation ang isa ka pamatuod nga wala sang may ginapasulabi ang otoridad sa pag-disiplina sa mga nagahimo sang iregulidad.
Pahayag pa ni Pamuspusan, nagalaum siya nga maga-serbe ini bilang leksyon sa mga pulis, senior officers man ukon indi, nga seryoso ang IMEG sa ila katungdanan sa pag-monitor sa mga opisyal.
Dugang pa sang natungdan, ang kaangay nga mga operasyon sang nasambit nga pamunuan ang direkta nga mandu sang PNP national headquaters ukon Camp Crame.
Suno kay Pamuspusan, bisan siya nga regional director ang wala nakahibalo sang ngalan sang mga opisyal nga yara sa listahan sang IMEG bangud ginakabig ini nga kontrobersyal.
Nahibaluan nga gindakup sanday Madrona kag Dela Cruz sang Pebrero 27 bangud sang robbery-extortion.
