Nagatukod ang probinsya sang Capiz sang pila ka mga stratehiya agud mabalik ang kumpyansa sang mga turista kag bisita sa industriya sang turismo sa lokal nga lebel.
Sa interview sang Bombo Radyo kay Mr. Alphonsus Tesoro, pinuno sang Capiz Provincial Tourism kag Cultural Affairs Office, iya ginpahayag nga pinaagi sa ila lima ka bulan nga social media tourism campaign nga ‘Capture Capiz’ sa diin magapost sila sang serye sang matahum nga laragway kag videos, mabuligan sini promote ang turismo sang probinsya sa online platform.
Magluwas diri, nagahiwat man sila sang ‘street market’ kada imbukada kag ika-16 sang bulan sa katuyuan nga mabuligan nga mapromote ang homemade nga mga produkto sang local food producers.
Kaupod ang farmers association sang probinsya sang Capiz, ginlunsyar man umpisa sang Pebrero 16 ang ‘Kaon ta, A Rolling Karinderya’ ukon ang ‘restaurant on wheels’ agud ipromote man ang pagkaon sang local restaurants sa probinsya.
Suno kay Tesoro, magluwas diri, ginhatagan man sang livelihood assistance kag libre nga mga materials ang mga Indigenous People (IPs) agud mapadayon ang pag-obra sang pinasahi nga mga face mask, wallet, bag kag home decorations.
Ang kwarta naman ukon sales nga matipon sang mga IPs ang ginabalik man sa ila.
Ginpahayag man sang natungdan nga importante nga mag-adopt man ang turismo sang Capiz sa ‘new normal’, gani ginabalay man nila ang mga aktibidad sang probinsya nga ilunsyar pinaagi sa online platform.
Yari ang kabahin sang pahayag ni Mr. Alphonsus Tesoro, pinuno sang Capiz Provincial Tourism kag Cultural Affairs Office, sa ginhiwat nga panel discussion sang Bombo Radyo angot sa turismo sa tunga sang COVID-19 pandemic.
