GUIMARAS – Magabaton sang Locally Stranded Individual ang Guimaras Provincial Government depende sa masarangan sang available nga pondo.
Sa interview sang Bombo Radyo kay Gov. Samuel Gumarin, iya ginpahayag nga indi niya mahimo nga balibaran ang mga Locally Stranded Individual bangud sa rason nga sila ang residente sang Guimaras.
Ang ginakahangaw-an lang niya suno kay Gumarin amo nga wala niya mahibaluan ang kabug-usan nga numero sang mga Locally Stranded Individual nga natalana nga magapauli bangud mahimo nga kulangon ang pondo sang probinsya.
May kaangtanan sa guidelines nga ginapaguwa sang National Task Force kag sang National Inter-Agency Task Force, mas makapaayo suno kay Gumarin nga sundon na lang ang protocol sang tagsa ka Local Government Unit.
Ang mga Local Chief Executive suno sa Gobernador ang mas nakahibalo sang ikasarang kag sang sitwasyon sa lugar nga ila nasakupan.
May kaangtanan naman sa pagpasirado sang mga patyo umpisa Oktubre 31 tubtub Nobyembre 2, ginpahayag sang natungdan nga mahimo nga may yara lang sang adjustment nga ipatuman sa probinsya sang Guimaras.
