ILOILO – May pila lamang ka pagbag-o sa probisyon sang Executive Order ni Gov. Arthur Defensor Jr. tuhoy sa Modified General Community Quarantine sa tion nga malakip na sa low risk areas ang probinsya sang Iloilo.
Sa interview sang Bombo Radyo kay Defensor, iya ginpahayag nga gamay lang nga adjustments ang pagahimuon sa tion nga may yara sang shifting sa MGCQ kag sa low risk.
Suno kay Defensor, lakip sa pagatutukan amo ang pagpasangkad sang ekonomiya sang probinsya kun sa diin ginabalay na ang recovery program sa tion nga may deklarasyon na si Presidente Rodrigo Duterte sa Hunyo 15.
Ginpahayag ni Defensor nga isa man sa pagatutukan amo ang pagpatuman sang minimum health standards kadungan sang pagbuhin sang quarantine restrictions sa bug-os nga probinsya.
Sa subong suno sa Gobernador, dapat gid nga tutukan ang COVID-19 response agud nga indi na maglala ang halit nga mahimo ituga sang virus.
May kaangtanan diri, magapadayon man sa gihapon ang Limpyo GCQ nga environmental cleanup campaign sang Iloilo Provincial Government.
