ILOILO – Nagaplano ang Sangguiniang Panlalawigan nga magbakal sang salakayan para sa mga board member sang Probinsya sang Iloilo.
Sa interview sang Bombo Radyo kay Iloilo Vice Governor Christine Garin, iya ginpahayag nga tuig 2019 pa sang ginrequest nila sa opisina sang Iloilo Governor ang pagbakal sang mga salakyan para sa 10 ka Board Members sa Iloilo Province lakip na sa presidente sang Sangguniang Kabataan (SK) federation, liga ng mga barangay president kag Philippine Councilors League (PCL) – IloIlo Chapter.
Suno kay Garin, kaundan sang ila hingyo amo ang pagbakal sang anom lamang ka salakayan sa diin sa lima ka distrito sang probinsya sang Iloilo, isa lamang ka salakyan para sa duha ka board members kag isa ka van para sa presidente sang SK federation, liga ng mga barangay president kag PCL – IloIlo Chapter.
Ginpahayag sang natungdan nga bangud sa COVID-19 pandemic wala pa sa gihapon nahitso ang tanan nga rekisitos para sa pagbakal sang salakyan.
Kapin P2 million suno kay Garin ang presyo sang isa ka salakyan kag dako ang mabulig sini para sa pagpasangkad sang trabaho nila ilabi na sa COVID-19 response.
