ILOILO – Wala sang may nakita nga rason si Gov. Arthur Defensor Jr. nga pataasan ang quarantine classification sa probinsya sang Iloilo.
Ini ang may kaangtanan sa announcement ni Mayor Jerry Treñas nga ipaidalom sa Modified Enhanced Community Quarantine ang syudad sang Iloilo epektibo Setyembre 24 tubtub Oktubre 9 bangud sa nagataas nga kaso sang COVID-19.
Sa interview sang Bombo Radyo kay Gov. Defensor, iya ginpahayag nga magapabilin sa Modified General Community Quarantine ang bug-os nga probinsya bangud nga manubo ang COVID-19 cases nga na record sang Provincial Health Office.
Bangud nga ginpataasan ang quarantine classification sa syudad sang Iloilo, ginpahayag ni Gov. Defensor nga may yara man sang adjustment nga ipatuman sa probinsya sang Iloilo ilabi na sa inter-zonal provision.
Sa pagpaathag ni Gov. Defensor, kinahanglan nga mangin balanse ang protocol nga ginapatuman sa syudad kag sa probinsya bangud nga konektado ang ekonomiya sang duha.
Apisar sini, ginpahayag sang gobernador nga hulaton niya ang opisyal nga Executive Order gikan sa National Inter-Agency Task Force antes magpaguwa sang kaugalingon nga Executive Order.
Nahibalu-an nga sa idalom sang Modified Enhanced Community Quarantine, dapat nga sundon ang strict home quarantine, ginadumili-an ang public transport kasubong sang land, air kag sea, may yara sang border restrictions, limitado lamang sa 5 ka patricipants ang mass gathering kag ang government agencies ang maga-operate sa skeleton workforce.
Sa syudad sang Iloilo, nakasaad sa Executive Order ni Mayor Treñas nga wala sang border restrictions kag magapadayon ang byahe sang -depampasahero nga salakyan apang istrikto nga ipatuman ang total liquor ban kag curfew umpisa 9:00 sa gab-i tubtub 4:00 sa kaagahon.
