ILOILO CITY – Nag-apelar ang Iloilo Provincial Government sa Land Transportation Franchising and Regulatory Board (LTFRB) nga kun mahimo suspendiron anay ang Local Public Transport Route Plan (LPTRP) sang syudad sang Iloilo.
Ini bangud man nga tuman ka dako sang nangin epekto sang LPTRP sang syudad sa ruta sang mga provincial transport groups kag mangin sa bilog nga transport system sang probinsya.
Sa interview sang Bombo Radyo kay Mario Nillos, head sang Iloilo Provincial Planning and Development Office (PDDO), iya ginpahayag nga wala na sila sang option kundi sundon na gid lamang ang nasambit nga route plan.
Nag-apelar man sila nga kun mahimo makakuha sila sang ruta sa syudad apang iya sang LTFRB kag DOTr ang desisyon gani masunod na gid lamang ang probinsya.
Apang, mahimo naman nga maka-apply sang franchise sa mga ruta sa syudad ang mga provincial jeepneys.
Nahibaluan nga tubtob sa Marso 24 ang final selection sang LTFRB sa tanan nga mga gusto nga magkuha sang franchise sa mga ruta sa syudad.
Naintindihan man sang probinsya suno kay Nillos nga ginkonsiderar man sang Iloilo City ang mga provincial jeepneys apang may yara sang parameters nga gin-set ang DOTr.
Samtang, ang probinsya sang Iloilo ang padayon nga naga-finalize sang ila kaugalingon nga Local Public Transport Route Plan (LPTRP).
