ILOILO – Nagpanguna ang probinsya sang Iloilo sa Western Visayas sa pagsecure sang approval nagikan sa Department of Health (DOH) para sa COVID-19 vaccination plan.
Sa interview sang Bombo Radyo kay Dr. Mary Jane Juanico, COVID-19 spokesperson kag pinuno sang Infectious Disease Section sang DOH Region VI, iya ginpahayag nga mahimo na nga mapagwa sang provincial government ang COVID-19 Vaccine Deployment and Immunization Plan 2021-2022 (COVAC PLAN 21-22).
Suno sa iya, wala na sang may gindugang ukon ginbuhin ang DOH sa COVAC PLAN 21-22.
Ang COVAC PLAN 21-22 ang ginpasa ni Governor Arthur Defensor Jr. sa DOH sang Pebrero 4.
Ginpirmahan naman ni Defensor ang executive order nga naga-adopt sang COVAC PLAN 21-22 nga ginbase sa framework nga ginplastar sang Department of Health.
Suno kay Juanico, 51 ka pahina ang kaundan sang vaccination plan sa diin katuyuan sini nga mahatagan sang libre, epektibo, safe kag may mataas nga kalidad sang bakuna batok sa COVID-19 ang pumuluyo sang probinsya.
Yari ang kabahin sang vaccination plan sa probinsya sang Iloilo:
- financing kag funding mechanisms
- identification sang eligible population
- vaccination procurement kag delivery strategies
- cold chain, supply kag healthcare waste management
- human resource management kag training
- acceptance kag uptake
- vaccine immunization safety monitoring, Adverse event following immunization (AEFI) ukon adverse event of special interest (AESI), kag post marketing surveillance and management, kag pharmacovigilance
- immunization, registration, monitoring kag data management systems
Ginpahayag ni Juanico nga plano man nga buligan sang provincial government ang iban nga kabanwahanan sa pag-obra sang vaccination plans.
Ginkumpirma niya nga ang Iloilo Province pa lamang ang nakapublish kag nakapasa sang vaccination scheme sa Western Visayas.
Matandaan nga sang Disyembre 2020, nagpain sang P95 million ang probinsya sang Iloilo agud ibakal sang 270,000 doses sang AZD1222 Vaccine nagikan sa British pharmaceutical firm nga AstraZeneca.
