Nagdangat na sa P1.18 billion ang kapyerdehan nga na-rekord sa probinsya sang Iloilo bangud sang red striped soft scale insect (RSSI) infestation.
Sandig sa data sang Provincial Agriculture Office, P122.47 million diri amo ang totally damaged production, samtang nagalab-ot naman sa P1.059 billion ang partially damaged crops.
Suno kay Iloilo Governor Arthur Defensor Jr., ginapreparar na subong sang probinsya ang mga protocol agud nga may direksyon ang response sa infestation.
Kun ma-finalize na ini nga protocols, magapadayon na ang Iloilo Provincial Government sa request nga province-wide declaration sang state of calamity.
Suno pa sa gobernador, naistoryahan man nila ni Social Welfare Secretary Rex Gatchalian ang posible nga bulig nga ihatag sa mga mangunguma nga apektado sang RSSI.
Lakip sa bulig halin sa national government amo ang ginapaagi sa Assistance to Individuals in Crisis Situation (AICS) program sang Department of Social Welfare and Development (DSWD) nga amo ang magahatag sang financial aid sa apektado nga mga mangunguma.
Magluwas diri, nagapakig-angot man ang probinsya sa Community Defense Cluster para sa biosecurity measures agud nga malikawan ang paglapta sang peste.
Nahibaluan nga tatlo na ka local government units sa probinsya ang separado nga nakadeklarar sang state of calamity bangud sa RSSI nga amo ang Passi City, San Enrique, kag Duenas.#
