Amat-amat na nga nagakasabat ang problema sa kakulangan sang classrooms sa probinsya sang Iloilo.
Ginpahayag ini ni Schools Division of Iloilo superintendent Dr. Ernesto Servillon, Jr. kasunod sang groundbreaking ceremony sa Pavia National High School para sa tatlo ka bag-o nga school buildings sa balor nga P195.25 million. Ini paagi sa opisina ni Uswag Ilonggo Representative James “Jojo” Ang, Department of Public Works and Highways, kag Department of Education.
Suno kay Servillon, ini nga bulig sang local government officials, mga kongresista, kag mangin sang private groups ang makabig nga daku gid nga tikang agud nga masolbar na ang classroom shortage sa probinsya.
Una na ginpahayag sang Schools Division Office sang Agusto 2023 nga kinahanglan ang 302 ka classrooms sa 1st District; 297 sa 2nd District; 385 sa 3rd District; 219 sa 4th District; kag 449 sa 5th District.
Suno kay Servillon, base sa timeframe, indi masigurado nga gilayon na ma-address ang classroom shortage sa pagbukas sang bag-o nga school year sa Hulyo apang may yara man sang mga mekanismo nga ginahimo ang talatapan kaangay sang pag-utilize sa mga library, lunch counter nga gina-covert sa classrooms, makeshift classrooms kag iban pa.
Nahibaluan nga agud ma-address ang ini nga problema sa probinsya, nagpain ang national government sang P1.041 billion sa General Appropriations Act (GAA) para sa construction sang 160 classrooms.
Ini nga pondo ang ginalauman nga makapanubo sang classroom deficit sang tubtub sa 40 percent.
Ini nga alokasyon ang magapasiguro sang patas nga distribusyon sang classrooms sa bilog nga probinsya kun sa diin natumod na ang recipient nga mga eskwelahan.
(Photo: PIA)
