Napalab-ot na sa Local Economic Enterprise Office ang problema sa naguba nga elevator sa newly developed nga Iloilo Central Market.
Naguba ini kadungan man sa mamunog nga pag-ulan kahapon nga adlaw.
Suno sa mga vendors, nagapangayo sila sang bulig bangud wala sila nakapangaman sa natabo nga pagkaguba sang elevator.
Mabudlay man ini para sa ila ang magpasaka sang mga produkto padulong sa ikatatlo nga panalgan bangud wala naga-function ang elevator.
Sa interview sang Bombo Radyo kay Maricel Mabaquiao, head sang Local Economic Enterprise Office (LEEO), iya ginpahayag nga gin-address na sang management ang problema kag ginhimuan na sang report nga igapasa sa SM.
Suno sa iya, may ara sang 100 percent refund para sa mga apektado nga parte sang merkado.
Ginpahayag man sini nga maayo nga timprano pa lang nahibaluan na ang isyu para ma-address ang problema.
Dugang pa ni Mabaquiao nga magahatag sila sang assistance sa mga apektado nga vendors, ilabi na ang mga nabasa ang produkto nga bugas bangud sa tubig nga halin sa drainage.
Sa subong, nagaresponde na ang contractor para sa pagpakay-o sang mga naguba, kag ginpasalig nga ma-address ini gilayon.
Sa Lunes, magahiwat sang walk-through inspection kag imbestigasyon upod ang city engineers.
Nahibaluan man nga kahapon nga adlaw nagkalabuka ang mga tiles malapit sa entrance sang Iloilo Central Market matapos magbulwak ang tubig halin sa naglupok nga drainage.
