ILOILO CITY – Problema sa paghigugma ang ginapahayag rason sang pag-suicide sang isa ka lalaki isa ka adlaw matapos ang iya kaadlawan sa Sta. Rosa Mandurriao Iloilo, City.
Nahibaluan nga nagbitay sa sulod sang CR sang ginatiniran nga barracks sa nasambit nga lugar ang biktima nga si Alias Lloyd, legal ang edad, tumandok sang Bantayan, Cebu.
Sa interview sang Bombo Radyo kay Police Major Jonathan Pinuela, hepe sang Mandurriao Police Station, iya ginpahayag nga nahisugtan sang pamilya ni Lloyd nga ipaidalom na sa autopsy examination ang lawas sini.
Suno kay Pinuela, sa ila pagpanalawsaw, natukiban sang biktima nga may yara na sang bana kag bata ang iya nobya sa diin nagresulta ini sa iya pagka-depress.
Nagapangkilkil suno kay Pinuela sang kwarta ang nobya ni Lloyd kag madugay na siya nga ginatunto.
Makapila na suno sa natungdan nga mag-attempt sang suicide ang biktima antes nadayunan.
