ILOILO CITY – Nasolusyunan na ang mga problema sang Western Visayas delegation sa Palarong Pambansa 2018 sa siyudad sang Vigan.
Suno kay Nicasio Valenzuela, regional sports manager sang Western Visayas delegation, nangin problema nila ang kagamay sang mga hulot, kakulang sang beddings, indi bastante nga supply sang tubig kag malayo nga billeting area sa Bulag Elementary School kag Bantay National High School.
Ang ginhimo nila suno kay Valenzuela nga gindugang nila ang magagmay nga grupo sang mga atleta sa iban nga dalagko nga grupo sang athletes agud mangin mas malapit sa Quirino Stadium nga amo ang main playing venue.
Naamat-amatan naman sabat sang Vigan LGU ang kakulang sang mga beddings kag gin-augment na ang Bureau of Fire Protection para masolusyunan ang kakulang sang tubig.
May mga transportation vehicles man nga ginhatag para sa matalunsay nga pagsugat-dul-ong sa mga atleta.
Nahibaluan nga paagi sa paglab-ot sang mga Bombo Radyo stations sa mga contingents sang mga rehiyon, mismo ang Bombo Radyo Vigan ang nagpahibalo sa mga tagdumalahan sang mga eskwelahan tuhoy sa problema.
Ang Bombo Radyo Philippines amo ang official media partner sang Palarong Pambansa 2018.