ILOILO CITY – Gindepensahan sang National Police Commission ang pahayag sang Police Regional Office VI nga may kinamatarong nga magpa-re-test kag mag-challenge sang resulta ang mga pulis nga nagpositibo sa illegal drug use test.
Matandaan nga sa Western Visayas, duha ka pulis nga lunsay taga-Negros Occidental ang nag-gwa sa recent kag initial test nga nagagamit sang shabu.
Sila ang ginpaidalom sa illegal drug use test sang separado nga petsa — Disyembre 5, 2020 kag Enero 19, 2021.
Wala sang kumpirmasyon halin sa PRO VI kun sanday sin-o ini nga mga pulis apang una na ginpahayag ni PRO VI Director Police Brigadier General Rolando Miranda nga may rangko nga Police Corporal kag Police Master Sergeant ang duha ka ginatumod nga police personnel.
Ang isa ka pulis ang naga-duty pa subong sa Regional Personnel Holding and Accounting Unit (RPHAU) samtang ginapahayag nga wala na nag-report sa trabaho ang isa pa ka pulis.
Sa interview sang Bombo Radyo kay Miranda, iya ginpahayag nga apisar CONCLUSIVE ang drug test, may DUE PROCESS nga ginasunod gani kinahanglan pa sila nga ipaidalom sa re-test antes ang pre-charge investigation.
May proseso ang pulis nga indi mahangpan sang publiko suno kay Miranda apang ila ini nga ipatuman.
“Conclusive yun [initial test]. Kaya lang, may tinatawag tayong due process. Meron kasi kaming proseso na hindi ni’yo naiintindihan, nasa amin lang yun, okay?”
“MAY GROUND KAG CAUSE”
Ini nga pahayag ang ginkumpormehan man ni Atty. Joseph Celis, pinuno sang NAPOLCOM Region VI.
Suno kay Celis, sibilyan man ukon uniformed personnel, may yara sang dapat nga sundon nga PROCEDURAL DUE PROCESS agud mangin patas man ang imbestigasyon sa ila nga kinamatarong.
Suno kay Celis, indi sila basta-basta kag makapalagpat sa pagsipa sa pulis halin sa serbisyo bangud kinahanglan ang AUTHENTIC, GENUINE, kag INDI OBRA-OBRA LANG nga ebidensya.
Pahayag ni Celis, kun indi nila mapamatud-an nga wala sila nagagamit sang iligal nga droga, wala na sang rason nga magpabilin pa sila sa serbisyo sa hanay sang Philippine National Police.
“Pareho bala sa iban nga obra nga nagsala ka lang kag indi mauyunan sang boss mo… nga wala man sang ground or cause… ginpahalin ka lang. That is injustice sa part sang person nga pahalinon mo lang. Kinahanglan may valid cause or ground ka.”
“BASI MAY IBAN NGA MEDICATIONS”
Suno naman kay Pol. Lt. Col. Joem Malong, may natabo na sa Police Regional Office VI duha ka tuig na ang nagligad nga may pulis nga nagpositibo sa una nga illegal drug use test apang nagnegatibo sa confirmatory test.
Suno kay Malong, posible nga apektado ini sang iban nga mga bulong nga indi man iligal.
Ang proseso suno kay Malong amo nga kun mag-gwa na ang una nga resulta sa test, iga-endorso ini sa Regional Investigation and Detective Management Division.
Hatagan sang 15 ka adlaw ang police personnel agud maka-signify nga ma-contest ukon ma-challenge ang resulta sang test.
Magabulig ang Regional Crime Laboratory Office agud masumite sa lain nga accredited testing center ang specimen sang pulis.
Kun positibo gihapon ang resulta sa ikaduha nga test, maga-proceed na sa pre-charge investigation kag pagkatapos, ipatigayon na ang summary dismisal proceedings.
“There could be medications being taken by our personnel nga indi man ya illegal drugs. Sometimes naga-positive siya sa initial test and that is why we need a confirmatory test.”
“ALL-YEAR-ROUND DRUG TESTING”
Nahibaluan nga sa Western Visayas, masobra na sa 50% sang bilog nga pwersa sang kapulisan ang napaidalom sa drug test.
Bilog nga tuig ini nga himuon — gina-administer sang Regional Crime Laboratory Office kag gina-surpervise sang Regional Investigation and Detective Management Division.
Katuyuan sini amo nga mapat-od nga wala sang PNP Personnel nga involved sa anuman nga aktibidad sa iligal nga droga — user man, pusher, ukon drug protector.
