ILOILO- Padayunon sang Iloilo Provincial Government ang corn terracing program sa Northern Iloilo.
Sa interview sang Bombo Radyo kay Mitchie Peñaflorida, senior environmental management specialist sang Provincial Environment and Natural Resources Office, iya ginpahayag nga may yara sang technical assistance nga ginahatag ang talatapan sa mga mangunguma sa Quinto Distrito agud ma-practice na ini nga sahi sang pagtanom sang mais.
Suno kay Peñaflorida, indi na madula sa mga taga-Northern Iloilo ang mais gani dapat nga hatagan sang ihibalo ang mga mangunguma nga masunod ang terracing para sa conservation sang duta kag tubig kag mapanubo man sang risgo sang pagkatiphag sang duta.
Ang contour farming ang plano man nga itudlo pa sa iban nga mga lugar ilabi na ang yara sa upland areas sa probinsya.
Sa bahin naman sang pagtanum sang mga kahoy, 11 ka milyon na ang natanum nga seedlings sa probinsya halin sang 2011 apang 5 milyon lang ang nagtaas na.
Sa bulig sang Tanum Iloilo nga ginlunsar sang Setyembre 26, ginalauman nga mapauswag pa ang conservation, protection kag preservation sang palibot kag agud mabatuan ang epekto sang climate change.
Target sang Tanum Iloilo program nga makapatubo sang 1.5 million nga native kag fruit-bearing trees sa probinsya kada tuig.
Matandaan nga una naman nagpahayag si Iloilo Governor Arthur Defensor Jr. nga ang pagtanum sang kahoy ang ginakabig long-term solution sang Iloilo Provincial Government sa lapnagon nga pagbaha sa probinsya kun magbubo ang mamunog nga ulan.
