ILOILO CITY – Nangin madinalag-on ang ‘Hugpong Obrero’ nga programa sang Sentrong Alyansa ng mga Mamamayan Para Sa Bayan (SAMBAYANAN).
Sa interview sang Bombo Radyo kay Wenefredo Doblizo, pinuno sang SAMBAYANAN, iya ginpahayag nga ang tema sang ila proyekto amo ang ‘Pabaskugon kag Palaparon ang Paghiliusa sang mga Mamumugon kag Pumuluyo para sa Matuod nga Kalinong kag Kauswagan sang Sambayanan’ .
Suno kay Doblizo, katuyuan sang nasambit nga programa amo ang paghatag sang bulig sa mga mamumugon, urban poor, kag transport sector sang syudad sang Iloilo agud nga mapalab-ot sa gobyerno ang ila mga reklamo.
Bukas man suno sa natungdan ang SAMBAYANAN sa pagbulig sa nanuhay-tuhay nga sektor sang syudad sang Iloilo agud mapalab-ot sa gobyerno ang mga ginapangatubang nga sectoral challenges.
Nagpasalamat man si Doblizo sa pagtambong sang Department of Labor and Employment (DOLE), Land Transportation Office (LTO), kag Philippine Army agud mapamatian ang mga mamumugon, urban poor, kag transport sector sa ila nagkalain-lain nga concern.
