Dako nga bulig para sa Iloilo City Police Office (ICPO) ang ila ginlunsyar nga Project Tanod Lead agud mapanubo ang kriminalidad sa syudad.
Sa interview sang Bombo Radyo kay ICPO Director PCol. Wilbert Parilla, Director sang ICPO, iya ginpahayag nga positibo ang nangin resulta sang proyekto bangud sa hugot nga pagbantay sang mga barangay tanod kag kapulisan sa tagsa ka komunidad.
Suno kay Parilla, kabahin sang implementasyon sang proyekto ang pag-file sang kaso batok sa mga nagalapas sang kasuguan.
Ginalista man sang mga otoridad ang mga menor de edad nga nagalapas sang ordinansa kag ginapatuman ang curfew for minors agud malikawan paguwa sa ila balay kun mag alas-10 na sang gab-i.
Dugang pa sang opisyal, nagaroving ang mga barangay tanod kaupod sang mga pulis halin alas-8 sang gab-i tubtob alas-12 sang tungang gab-i, nga amo ang oras nga mas ginatutukan nila sa pagpatigayon sang seguridad sa mga barangay.
Bangud sang amo nga proyekto nag-gamay ang kaso sang kriminalidad sa syudad kag mas nagbakod ang pagbantay sa publiko.
