Nag-walk out na, namuyayaw pa.
Ini ang ginhimo ni Daniel Stefan Robertsen, ang proponent sang 50-megawatt hyperscale Artificial Intelligence (AI) data center sa Oton, Iloilo kadungan sang public consultation nga ginpatigayon subong nga hapon.
Nagaserbe si Robertsen nga data center manager sang Terakraft AS, isa ka AI data center operator nga nakabase sa Oslo kag Sauda sa Norway.
Samtang yara sa Chapel sang barangay, nag-walkout si Robertsen samtang makit-an naman ang mga tumalambong nga nagapalakpak.
Makit-an naman ang iban nga mga residente nga nagkadto sa venue kag may dala nga posters kun sa diin nakasulat ang mga posible nga halit nga dal-on sang data center sa komunidad.
Lakip diri ang: “Pax silica halit sa mga mangunguma”, “Data center halit sa lupa kag tubig”, “Hindi ipagpapalit ang lupa at tubig at kabuhayan,” kag “No to Pax Silica.”
Sang yara naman sa gwa, ginpalapitan sang media si Robertsen apang naakig ini sa nagakuha sa iya sang videos. Nagpamahog pa ini kun padayunon ang pagkuha sang footage, dal-on niya ini sa korte.
“If you don’t have brain, just f*ck! Go away,” suno kay Robertsen.
“Do you know Filipino… Filipino Privacy Law? You are not allowed to take pictures,” dugang pa sini.
Nahibaluan nga antes pa man ang konsultasyon subong nga adlaw, madamo na ang nagpakamalaot kag naakig sa amo nga proposed development sang 10-hectare hyperscale AI data center campus.
Ini nga ginaproponer nga pasilidad ang gindesinyo nga may kabug-usan nga load capacity nga 50 megawatts (MW).
Sa nauna nga post ni Oton Vice Mayor Jose Neil Olivares kaina sang aga, ginklaro sini nga wala sang gina-endorso ang Sangguniang Bayan agud nga tugutan ang amo nga Norwegian company nga magtukod sang data center sa Abilay Sur.
Pahayag sini, hatagan anay sang tyempo ang mga pumuluyo nga maghatag sang ila sentimyento sa proyekto.
“Aton ginapasiguro sa mga natungdan nga pumuluyo nga aton tun-an sing maayo ang tanan nga anggolo kag implikasyon [ pros and cons] antes kita maghatag sang desisyon sa sini nga proyekto,” suno sa bise-alcalde.#
