ILOILO CITY- Hugot sa gihapon nga ginapamatukan ni Iloilo 3rd District Rep. Lorenz Defensor ang proposed amendment sa Comprehensive Dangerous Drugs Act apisar nga napasar na ini sa kamara kag ipasa na sa senado.
Sa interview sang Bombo Radyo kay Rep. Defensor, iya ginpahayag nga isa siya sa 11 ka mga kongresista nga nagboto sang NO sa ginaduso nga pagbag-o sa Republic Act No. 9165, samtang siyam naman ka kongresista ang nag-abstain kag 188 gid ang nagboto nga YES.
Suno sa mamalidha nga nagaserbe nga vice-chair sang Committee on Constitutional Amendments sa kamara, iligal kag nagalapas sa konstitusyon ang ginaduso nga mga probisyon.
Partikular nga gintumod sang mamalidha nga unconstitutional nga probisyon sa hagna amo ang ‘automatic’ presumption of guilt sang mga indibidwal nga natabuan nga yara sa sulod sang balay nga subject sang isa ka drug operation apisar indi sila ang subjects sang arrest ukon search warrant.
Pila man sa nag-upod kay Defensor nga nagboto nga NO amo sanday Quezon City 4th district Rep. Jesus Suntay nga amo ang chairman sang House Committee on Human Rights, Marikina City 2nd District Rep. Stella Luz Quimbo, kag mga myembro sang Makabayan Bloc sa kamara.
Nagalaom naman si Defensor nga magapasar ang senado sang bersyon sang hagna nga mangin constitutional kag magaprotihir sa gihapon sang tawhanon nga kinamatarong.
