Aprubado na sang Senado sa ikatatlo kag katapusan nga pagbasa ang ginaproponer nga P6.793 trillion nga national budget para sa 2026.
17 ka mga senador ang nagboto-pabor diri kag wala sang negative votes ukon abstentions.
Matandaan nga nakalusot ang approved House Bill No. 4058 sa second reading sa upper chamber sang Disyembre 4.
Bangud pareho na nga nakalusot sa Kamara kag Senado ang ila bersyon sang 2026 national budget, sunod nga patigayunon ang bicameral conference committee meeting. Ginalauman nga matabo ini sa Disyembre 11-13.
Ini nga bicameral panel amo ang maga-collaborate kag magahimo sang reconciled version sang national funding para sa masunod nga tuig. Kun ma-reconcile na, igabalik ang hagna sa duha ka chambers sang Kongreso para sa ratification.
Ang naratipikahan nga bersyon amo naman ang igapasa sa opisina ni President Ferdinand Marcos Jr. agud mapirmahan niya ini kag mahimo nga layi. Ginalauman nga mapirmahan ini sang Presidente sa Disyembre 29.
Suno kay Senator Sherwin Gatchalian, chair sang Senate finance committee, “more transparent, more disciplined, kag more accountable” ipaanggid sang una ang kaundan sang proposed 2026 national budget.
Sa idalom sang Senate version, nagapabilin ang Department of Education (DepEd) nga may pinakamataas nga budget nga P1.37 trillion.
Sa sini nga pondo, P65.93 billion ang para sa construction sang masobra 24,000 ka bag-o nga classrooms sa bilog nga pungsod kag P28.66 billion naman para sa implementasyon sang school-based feeding programs.
Sa pihak nga bahin, ginalauman man nga mas mangin mabakod ang zero balance billing program sang hospitals sa idalom sang Department of Health (DOH) nga makabaton naman sang P62.66 billion sa allocations.
