Naghingyo na ang House prosecution team nga magpagwa ang impeachment court sang subpoena para mag-atubang kag magtestigo si anay Senator Antonio Trillanes IV sa trial ni Vice President Sara Duterte sa masunod nga semana.
Sa ila nga manifestation, ginpangabay sang prosecution ang testimoniya ni Trillanes kaangot sa Article Two sang Articles of Impeachment.
Sakop sini ang mga alegasyon kaangot sa ginapahayag nga unexplained wealth ni Duterte kag ang gina-alegar nga pagbaton ukon pagkuha sini sang pondo halin sa mga tawo ukon sources nga gin-identify sa mga ebidensya nga ginpresentar sa impeachment court.
Nauna na nga ginpahayag ni Deputy Speaker Paolo Ortega V nga ginalauman nga maga-testigo si Trillanes apang sang amo nga tion, wala siya naghatag sang petsa kun san-o magapungko bilang witness ang anay senador.
Suno kay Ortega, posible nga ihatag ni Trillanes ang resulta sang iya kaugalingon nga imbestigasyon kaangot sa ginaalegar nga unexplained wealth sang respondent.
Pahayag pa sang kongresista, importante ang testimoniya sang former senator bangod madugay na niya nga gina-usisa ang pinansyal nga mga transaksyon sang pamilya Duterte.
Samtang, ginpahayag naman anay ni House Prosecutor Representative Joel Chua nga ginkumparar sang mga miyembro sang House ang pila ka dokumento nga ginpresentar ni Trillanes sa mga bank transactions nga gin-flag sang Anti-Money Laundering Council ukon AMLC.
Suno kay Chua, ginpamangkot na ni Trillanes ang pinansyal nga kahimtangan sang pamilya Duterte antes pa nagsugod ang impeachment trial kag nakatambong na siya bilang resource person sa House Committee on Justice.
Dugang sang mamalidha, ang mga prosecutor nga nagadumala sang kaso ang magadesisyon kon ano nga mga impormasyon kag testimonya ang ila kinahanglan halin kay Trillanes.
Sa House hearing sang Abril 22, matandaan nga ginpamatud-an ni AMLC Executive Director Ronel Buenaventura nga 18 ka pinili nga entries halin sa mga dokumento ni Trillanes ang may kapareho nga mga transaksyon sa AMLC reports.#
