ILOILO CITY – Mas ginpadali na lang subong ang proseso sang domestic adoption ukon pag-adoptar sang isa ka bata.
Sa interview sang Bombo Radyo kay Janice Brasileño, Officer-in-charge sang Regional Alternative Child Care Office Region VI, iya ginpahayag nga pinaagi sa Republic Act No. 11642 ukon ang Domestic Administrative Adoption and Alternative Child Care Act, mas mahapos na lang ang pag-adoptar pinaagi sa paghimo sang administratibo nga proseso kag indi na kinahanglan nga mag-agi sa korte.
Suno kay Brasileño, ang proseso sang pag-adoptar ang ginpasa na sa National Authority for Child Care (NACC), isa ka attached agency sa Department of Social Welfare and Development (DSWD).
Ginpahayag sang natungdan nga pinaagi sini indi na mangin magasto kun ang isa ka bala ang gindeklarar nga child legally available for adoption (CLAA).
Nahibaluan nga ang isa ka bata ang makabig nga available for adoption kun ini ang ginpabay-an, gin-abandoner ukon ginbayaan sang iya mga ginikanan.
