Padayon ang protesta sang mga residente sang Myanmar matapos ang tensyon nga nagakatabo sa diin kontrolado subong sang militar ang pungsod.
Matandaan nga pwersahan nga gindakop sang militar ang de facto leader sang Myanmar nga si Aung San Suu Kyi sa idalom sang iya titulo bilang state counsellor bangud sa ginapahayag paglapas sa import kag export laws sang pungsod.
Suno kay Bombo International Correspondent Atty. Jobert Pahilga direkta sa Myanmar, iya ginpahayag nga kada gab-i, lapnagon ang ‘nationally coordinated noise barrage’ nga ginapatigayon sang mga pumuluyo sa katuyuan nga mapauntat ang pagkontrol sang militar sa pungsod.
Suno kay Pahilga, ini nga civil disobedience movement ang gin-umpisahan sang professional nga sektor kaangay sang mga health workers, mga eskwelahan, kag government employees.
Ginpahayag sang natungdan nga ang isa sa protesta nga ginahimo sang mga tawo amo ang pagkanta kun gab-i sa mga dalanon sang protest song nga may lyrics nga ‘we will not forget and forgive the dictators’.
Suno sa natungdan, sa Lunes, Pebrero 8 magapatigayon pa sang dako nga rally ang nasambit nga grupo.
Halos tanan naman nga sektor suno kay Pahilga ang nagapanawagan nga ibalik sang militar ang gahom sang duly elected government.
